،،،،،،،،(رحم الوطن)،،،،،،،
وألف آه ياوطن
لما تعيش متهان
وادفع لوحدي التمن
وانا فرع م الأوطان
انت اللي فيك السكن
والسجن والسجان
وعروبة وقت المحن
بيقدموا النسوان
يادمع نازل شجن
يانار في لحظة تبان
كتبوا عليا إتسجن
وعذاب مافيهش ميزان
قالوا تسب الوطن
تخرج عزيز ونيشان
وطني كتير المنن
ماهمه أي جبان
قلبي عليه يؤتمن
حتى ولو فدان
في ترابة ريحة البدن
تتزين الأركان
اتوضا بيه لو حَزَن
وأصلي بيه لو هان
لوني بلونه إتعجن
ع الوجه نور وإيمان
شايل في إيدي الكفن
لأي واحد خان
يامسلمين الوثن
مايعبدوش إنسان
فيكوا اللي ضرب المثل
في عبادة الأوثان
أصل بعملكوا إترسم
على وشي ندل وذان
أنا بنت أقصى امتهن
يصرخ مافيش جدعان
ملايين كتيره امتحن
شهادات رسوب ان كان
والعدو عمره مارحم
حصدوا حياتنا رهان
بلدي وهبتك رحم
يزرع رجال في ميدان
من صغرهم في زخم
بيوت ماتحوي ببان
لكن مانعرف ندم
ولا في البطون شبعان
صهيون يربي الفتن
ويوزعوها الجان
وكل جني سكن
في لوحة م الأذهان
ياامة كذب ان فطن
وروجوه أعيان
الفرقة صبحت مدن
واتفجر البركان
قتل العلم بالقلم
ياأمه مالها أوان
صهيون يؤدي السنن
والمسلمين عِصْيَان
انا بنت يوم تتفطم
كنت أرفع الأعلام
أسراء أنا من زمن
متعذبه واتهان
قلبي واكبر هَرَم
مسجون ورا قضبان
لكن بصوتي الهَرِم
أرفع بصوتي أذان
يمكن في يوم بالكَلِـم
يتوحدو الشجعان
صهيوني لو يوم علم
وِحْدَة في اي مكان
خوفه وراح يستلم
ويشد في الإعلام
مهما شبابي إتعدم
ويحرقوا الأجسام
صامدة ولا اعرف ندم
جاهزة لأي ميدان
،،،،،،،،(شعر)،،،،،،،،،،
عبد الله السايح